Aw Camille...
Mi zawng zawngin an en tawh hnuah, thu tawp an siam dâwn hnaiah ka tuipui thar ve a, hmuhnawm ka tiin ngaihnawm ka va ti tehreng.
En mai chuan a vei lam a mi, hmelṭha zet mai, Amber Heard zuna uai mai hi awl tak tur chu a ni rêng a ni. Mahse Mizoin kan sawi ṭhin dan pakhat hian a nihna a sawi chiang fu mai... "Ṭhamawli"...
Mahse he Sap Ṭhamawli hmelṭhat leh duhawmna zawng zawng phena a dawt sawi leh tih dik loh zawng zawng mawi em em maia rawn hailang a, khawvêl tana ennawm hmuhnawm bîk min chhawp saktu, Johny Depp-a Dan Hremi, Camille Vasquez zunah hian kei ka uai daih mai.
A hmaa nula hmelṭha Amber Heard kha tunah chuan hmelṭhate hmelṭhatna tibawrhbangtu hmuhin kan hmu ta tlat. Hmelṭhatna hi finna leh rilru ṭhatna a thuam anih loh chuan, an ṭhat zawh poh leh an ngeiawm ting mai a ni.
A hmelṭha vak lo zawk, khawvêlin a hriat lar em em loh, mahse a chet dan leh awka chhuak aṭanga finna a thuam a ni tih hai theih miah loh Camille Vasquez erawhin a zuna uai lo thei lovin min siam tlat.
Instagram ah hian Arunachal Miss Tengam Celine Koyu hi ka follow ve a, he nu hi ka star viau bawk. A hmelthatna piah lamah, khawtlang tana a hnathawh hi hmuh tur a awm reng a, Zirna in thuam ṭhatna kawnga a hnathawh khu a hmuhnawm tak zet. Keini Miss lama intodelh em em te ai hian a thawk tam zawk mah angem aw ka ti rum rum ṭhin. (
)
Ka sawi tum ber zawk chu, hmelṭhate hmelṭhatna hi an hmuihmai ah ni lovin, a thlirtu thinlungah leh, an nungchang leh awka chhuakah zawk hian a lo awm a ni tih te mai hi.
No comments:
Post a Comment