MHIP Day pual

MHIP Day Chibai u le

(Mipa leh Hmeichhia hi kan intluk tlang em?)

    MHIP Day a lo thlen hian, ka nu kha ka hre chhuak thin. He khawvelah kum 35 lek cheng hman mahse, a nun leh thil tih hmanga a thusawite kha vawiin thlengin ka nunah hian a la ri nawn fo thin. A thinrim viau awm lai hi mitthla tur ka hmu miah lo a, mi a rel lai thawm hi ka bengah hian a cham reng reng lo, a ang buan buan thawm hi ka hre miah lo a, a vui lai hmel lah han mitthla tur engmah ka hmu lo. Chuti chung chuan vanduaina tam tak a nei ve a, tahpui vawng vawng tur thil tam tak a paltlang ve tih erawh ka hre chiang. Chuti chung chuan ka nu ka mitthla let hian, a nui hmel, midang a tanpui lai hmel leh lungawi hmel chauh hi ka mitthlaah hian a cham thin. Mahse ka nu ang kha khawvelah hian an va vang si em.

    A mal chauh pawha kan ngam loh, kan hlauh, kan zah leh kan tih deuh deuhte kha, a huhovin, pawl angin an han inhlawmkhawm ta teh reng ania. An puala ni khat Holiday an nei rup mai bik mai hian hmeichhiate ropuizia a tarlang chiang viau mai. An tawng tam poh leh mipate hian kan thiam lohna kan hre tam a, an tawng miah loh phei chuan mipa inti ve tak pawh hian kan tih dik loh leh kan tihsual ni awm thei ang hi inthlahrung deuhin kan ngaihtuah nghal zung zung mai thin.

    Hmeichhe chawikan tih leh intluktlanna tihte sawi a tam hle a, tun dinhmuna Mizote zingah chuan a letlingin kan intluktlang lo ta hle zawk niin a lang. Eizawnna thuah leh kawng hrang hrangah mipate hian hmeichhiate hnung kan zui zo ta meuh lo zawk niin a lang. Hei, vawiin ah pawh an pualin Zirna In leh Sawrkar Pisa zawng zawng an khar thuap mai anih hi.

    Hetia ngaih mai chuan hmeichhe chawikan leh intluktlanna hi sawi ngai lovin a chiang riau. Amaherawhchu he hnamah hian hmeichhiate dinhmun dik tak hi vantlang leh Kohhrana an chanvo leh nihna aiin, mizo mipate rilru leh, vantlang rilru chhungrila hmeichhiate nihna nia kan hriat leh kan ngaihdan zawk hi siam rem ngai leh thlak ngai chu a ni.

    Kohhran Hmeichhiain theihtawpin kum tam tak Kristian Chhungkua an buaipuia, vawiin a thalai rin tlak leh chhawr tlak heti zat kan la neih nachhan hi hmeichhiate vang a ni ti ila, kan daw tam lovang. Kohhran chhungkuaa Buhfaitham hmanga an rawngbawlna ringawt pawh hi thupui hran neia ziah tham khawpa ropui a ni. Chutih laiin mi tam tak chuan "Kohhran Hmeichhia tih tih angai lo, in lamah chhungkua awp lum se a tawk" tih tawngkam an cheh fo. He tawngkam hmang thinte rilru avang hian ani hmeichhe chawikan hi sawi a tul a, intluktlanna hi sawi nawn fo a tul thin.

    Mipa in nupui a sun a, kum 3/4 a liam a, nupui nei leh rawh, nupui zawn sak angai kan inti a, mipa nupui sun tawhin nupui dang a neih leh chuan, kum engzat pawh nise, putar pawh nise, kan inlawmpui liam liam thin. Hmeichhe pasal sun tawhin pasal a neih leh chuan, mipa kham lo, hmeichhe leplerh ah kan inchhuah lek lek thin. Pathlawiin a pathlawi vangin khawtlang a hlutna leh a dinhmun engmah a hloh loh laiin, nuthlawi chuan khawtlanga a hlutna leh zahawmna a hloh tlat. Hei hi intluktlanna chu maw? Sawrkar pisa leh Bazara hmeichhiate majority an nih avang ngawtin he hnama hmeichhiate dinhmun hi a tha ngawt lo. Kan rilru chhungrila kan pawm dan , hmeichhiate hi a hnuaihnung zawk leh chak lo zawk, thunei lo zawk, zalen lo zawk, mipate tih ang tih ve vek rem lo anga kan ngaih tlatna hian hmeichhiate hi chawikan ngai dinhmunah kan siam ta a ni.

    Kum 1971 ah Gustavo Gutierrez chuan "A Theology of Liberation" tih lehkhabu a tichhuak a, chu lehkhabu chu khawvel puma Pathian Thu zirna hnuanga thil her danglamtu lian tak pakhat a lo ni ta. Chumi hnuah Feminist Theologian tha tak tak an lo chhuak zui a, Mary Daly, Rosemary Radford Ruether leh midang ten lehkhabu hmangin hmeichhiate dinhmun chawikan tumin hmeichhe nihna an rawn chawi sang a, amaherawhchu, Feminist Movement ah hian a lutuk a awm thei ve bawk. Radical Feminism hi kan sawi mek hmeichhe dinhmun chawikan hian a hawi lo, mihring kan nih anga kan nihna dinhmun dik tak theuh kan luah a, chutiang anga kan inpawm tlan theih mai hi Feminist Theology tha berin a tum chu a ni mai. Chutiang ang Feminist Theology chu Chhanchhuahna Theology laipui "Liberation Theology" thil tum ber pawh a ni.

    Awp beh, hnuaichhiah, enhran, kal kan, hmuhsit nia inhriatna hian mihring pangngai hi mi anglo ah min siam thei a, chutiang anga hnuaihnung zawk leh awpbeh ni tlata inhriatna sal ata an zalen theihna tura, kan hmeichhiate kan pawm dan, kan hmuh dan leh kan thlir dan kan thlak a, an tana kan duh china ramri kan lo kham ve ngawtte vaw thiatin, Genesis 1:27 a "Tichuan Pathianin ama anpuiin mihring a siam a, Pathian anpui ngeiin a ni a siam ni; mipaah leh hmeichhiaah a siam a ni" a tih angin, inang, intluktlanga siam kan nih zia i hre thar leh teh ang u