Eng hi nge kan zawn ber le?

 Eng hi nge kan zawn ber le?

- Lawma Ralte

    Aizawl atanga Mel tam taka hla thingtlang khaw pakhatah chuan, in lian leh nuam ve tak, Aizawlah pawh awm se zahpuiawm hauh loh tur a lo ding to lur a, tun hma chuan chu inchhungah chuan chhungrual tak an cheng a, hlim thawm leh authawm a inchhawn zut thin. Khawvel hmasawn ruala hmasawn ve loh hlauhnate, nawmsak loh hlauhnate, eizawnna tha zawk neih duh vangte in, chu ina cheng thin thalai rualte chu thiamna paw chhuak turte, eizawnna tha zawk leh hlawk zawk neih inbeiseiin khawpui lamah an liam ta duak a, chu in lian leh nuam tak nghaktu chu nu leh pa, kum upa lam tawh, Gas bur khat pawh put harsat tan tawhte an ni ta.

    Thingtlangah, nu leh pain kuthnathawkin an fate an chawm a, an nawmsak loh hlauin zirna tha zawk pek an duh a, hah taka hna an thawh ve hlauin eizawnna tha zawk nei turin an duh a, mahse an awmna khuaah chuan chutiang hna hahdam leh tha zawk chu a awm si lo. Hmasawn duhna avangin faten ram tha zawk an zuan a, nu leh pa erawh chuan khawhar leh lunglen an hlawh ta thung si.

    Kan hmasawnna leh changkanna hian kan hmangaihte tahna, lunglenna leh khawharna hi engzat tak thlen tawh ang maw? Engnge changkan kan duh a, nawmsak kan duh a, hausak kan duh chhan ber hi ni ta ang le?

    Nu leh pa, kum upa lamte chu an comfort zone atangin hruaichhuakin, kan comfort zone ah kan pem pui a, thalai zawkte chu kan insiamrem a, kan tlei mai thin, mahse thingtlang nu leh pa, tukthuan ei hmaa thenawma thingpui hang in paha inkawm khawm thin, kutawl ngai thei lo, chuktuah huan siama an khamkhawp thar thin, an mut mai mai aia an phak tawk leh tui zawng ang an lo thawh ve bek beka hahdam zawk thinte chu, khawpuiah, in leh in insi khup karah, thenawm khawveng pawh kan inhmelhriat mang lohna, Building khata cheng pawh chaw thing kan inban ngam meuh lohna hmunah, tu leh fate kiangah khawhar leh zual turin, an thlamuanna hmun, kohhran leh khawtlang a neitu an nihna hmun atangin, mikhual khawhar ni turin kan han inhruai chhuak ta thin a nia…

    Mihring hian engnge maw kan zawn ber le? Eng duh hian nge kan thawh a, eng hi nge maw kan thlakhlelh ber ni ang le?

(Ka rilru a thu awm ber hi ka la ziak chhuak lo, nakina ziah chhunzawm leh atan heti hian kan dah tha phawt ange)