Reformation Day

 Reformation Day Pual

    Kum 504 kal ta, October 31, 1517 khan, kum 1507-a Puithiam atana nemngheh, German puithiam Martin Luther-a chuan, a hun laia Kohhran (Roman Catholic) kal dan, rin dan leh tih dan phung dik lo tam takte tarlangin, kawng dik zawk nia a ngaih te ziak chhuakin Wittenberg Biak in kawngkhar ah a thuziak chu a tar a, vawiin a "95 Theses" tia kan hriat tâk hi a ni. He a thu ziak avang hian Cardinal hmaa insawifiah tura koh niin, a dinna leh ṭan hmun a sawh sawn lo. Vawiin a Khawvel pumpui a Protestant kohhran lo pian chhan leh innghahna bulpui a lo ni ta.

    Tun laiin Kohhran sel leh kher zawnga thusawi leh ziak hmuh tur a tam ta hle. Martin Luther-a anga Reformer nih chak kan pung hluai. Mahse Martin Luther-a chu Kohhran hmangaihtu, a chhunga cheng, a kaw chhung hai phak khawpa hre bel a ni a, a hmangaih kohhran a dam lehna turin, a chhe ber pawh tuar huamin a pen chhuak a, a hnathawh rah chu a teltu leh sengtu kan ni. Social Media leh khawi lai emaw aṭanga kohhran kher chiam hi Kohhran Hmangaihtu zia tur a ni lo. A chhung aṭanga, engkim chan huama siamṭhat chi zawk a ni.

    Siamṭhat Kohhran chu siamṭhat reng ani a, a famkimna erawh hmuh theih loh kohhran, Van kan thlen huna kan chan turah chauh a ni thung ang. Kohhran neitu chu Pathian a ni a, a lungphum chu Lal Isua Krista a ni. Mi tling lo leh fel lo, famkim lo leh ṭawmkai lo te te ten he hmuh theih kohhrana kan phak tawk ang zela rawngbawl hna kan thawk ve thei hian, Thianghlim famkim Pathian ropuina, khawngaihna leh lainatna, ngaihdamna leh hmangaihna nasat zia a tarlang ṭhin.